Montesín
María Josefa Canellada.
"-Vamos, Montesín, fay daqué por tí mesmu. Pa que pódiamos vete medráu, col to tiempu desvelau. L'añu que vien, equí mesmu, co los to cuernos crecíos, com' un corciu bien tresnau y bien curiosu, juerte com' un robecu. Si non, ¿qué vamos facer?
-Agora mesmu una tronada pué ablucate, y vien una airada y llévate.
-Si non faces daqué, van morrir contigo tó los cabritos amorosiegos del mundu. Lo mesmu que los grandes bisontes que non podieren enferronase na vida.
-Anda, Montesín, cómite toa esa zanagoria rallada.
-Comi esa mozada bruseles.
-Y non la come. Yé que tá aviciayau.
-Non. Non ye rabalbu. Non yé por facemos rabiar, como los neños a les madres.
Non la come porque non sabe tovía, porque tien blandu el dentame, y tou pide el so bagar. Ya prebó una flor, pero agora non quier más que la so mamona. Allimpiámosy el focicu co les fueyes fresques de umeru. É la so sarbiyeta, y con elles quitámosy el pequeñu espumeru blancu que y espingorretia pe los llaos dimpués de fartucase co la mamona blanca y apinada. Hoy, chámosy adobíos nuevos a la lleche. Machucámosy bien francía una zanagoria y amecémosla co la lleche. Tou lo suerbe. Tamién y amecemos un garitu pan amoyentau, y otru poquiñín de salvau en sin cuenyos gordos. Tuviemos qu'agranday con unes tiseres los furaquinos de la so mamona".