.
CASIMIRO BARAGAÑA
" EXPRESIÓN "
Comentariu fechu por
Silvia Vega Palacio:
alumna de 1º de Bachillerato
en el IES "Río Nora".
Pola de Siero.
"Vienres, dieciséis de marzu, a les ocho y media la mañana yá tábemos llantaos delantre l'ayuntamientu La Pola. Díbamos ver el cuadru que punxeren a la entradal'edificiu, enfrente les escaleres. Nun yera un cuadru cualquiera, esti fixérelu ún de la Pola. Yera de Casimiro Baragaña, pintor que nel añu 1998 fue nombráu fíu predilectu de La Pola. Casimiro pintare yá en 1959 los frescos de la ilesia de la so parroquia, San Pedro, estos murales ocupen 130 metros cuadrados de paré.
Aunque esti paisanu, que profundizó en muchos temes, como retratos, llévanos güei a esti mural. Pintólu nunos siete paneles DM, de primeres con acrílicu pa la mancha y finólu dempués con óleo. Fueron siete meses los que-y llevó facelo, dende qu'entamó'l mes de mayu fasta avientu. Cuando-y encargaron el mural nun-y punxeren temática nenguna, asina que puquiñín a poco y con tola llibertá del mundiu púnxose per él.
Na más llegar, lo primero que ves ye un cuadru abstractu, un panelón de 3 x 4 enllenu de manchines y pincelauques en games malves, verdes o azules. Sentémosnos nes escaleres, tan curioses y nuevines, pa paramos un poco a velu bien. Ensin dame tiempu a sentame col boli na mano, dalgún compañeru míu ya viere que a un llau del cuadru había, a pincelaes disimulaes, camuflao, la bandera d'Asturies. Punxímosnos a buscar más y atopemos la figura de la ilesia La Pola. Paréme a lleer el cuestionariu que Paco preparare y púnxime a contestestar les entrugues.
Aquel cuadru nun me paecía que tratare de muncho, namai me paecía eso", la espresión de esa Pola que-y salía de dientro al pintor. Esa mitolóxica Pola enllena de naturaleza, viesques, paxarinos" Paecíame que'l cuadru nacía pela parte baxo, per onde salía'l troncu d'un gran arbolón. Esi arbolón yera como les raíces y el ñacer de lo que llueu s'espardía peles rames, eses figurines abstractes y que a la mesma vegada yeren representatives, como una " P " y una " S ". Nel centru'l cuadru, asina en collores más cálidos, cerque del mariellu, paecíanos ver un paxarín, engoláu na copa del arbolón.
Víase una progresión de collores de fríos a calientes de manera que te dibes acercando al centru, y una cosa que a min gustóme munchu y facía resaltar el cuadru, una franxa horizontal, que rompía la composición. Pa min yera como si una lluz traspasare'l troncu l'arbol ya iluminare una viesca, paecíame como un ventanu más allegre a la naturaleza astur que tantu-y gusta a esti pintor.
A min, personalmente, prestóme a esgaya, foi un gustu conocer dalgo del arte d'esti pintor de La Pola , que pa mi yera casi desconocíu. De xuru qu'agora cuando alcuentre la so firma n'otru cuadru, fixaréme dalgo más. Puedo decir que polo menos pa mín, na Pola hai un gran artista, aunque a naide-y debe caber la dulda".
Otros pintores en la páxina
Otros trabayos del mismu IES Eugenio de Nora
Trabajo de Laura Rodríguez Fonseca
Volver a ÍNDICE de la Esquisa